Եվրոպայի ամենամեծ կուսակցությունը քննադատում է արյունալի բախումները Լեռնային Ղարաբաղում

Բրյուսելյան «Հայաստանի եվրոպացի բարեկամները» կազմակերպությունը (EuFoA, www.EuFoA.am) ողջունելով այս փաստաթղթի ընդունումը, ի դեմս կազմակերպության ղեկավար պրն. Էդուարդո Լորենցո Օչոայի, հայտարարել է, որ «ողջունելի է Եվրոպական ժողովրդական կուսակցության կողմից նման արագ և հստակ արձագանքը ստեղծված իրավիճակին»:

«Հուսանք, որ եվրոպական մյուս կարևոր ինստիտուտները ևս հետևեն ԵԺԿ օրինակին»,-ասել է նա՝ ընդգծելով, որ այս բանաձևը կարևոր նշանակություն ունի, քանի որ խաղաղության հաստատման բանակցություններում Լեռնային Ղարաբաղին ներկայացնում է որպես բանակցող կողմ: Նշված բանաձևում նաև կոչ է արվում երկու կողմերի զինված ուժերը անհապաղ վերադարձնել իրենց նախնական դիրքերի, ինչպես որ դրանք եղել են ապրիլի 1-ի դրությամբ՝ հղում կատարելով բազմաթիվ այլ եվրոպական կառույցների:

«Վերջապես, բանաձևում նաև նշվում է, որ հակամարտությունը պետք է կարգավորվի խաղաղ բանակցությունների ճանապարհով և վերահաստատում է «պատրաստակամությունը վերադառնալու ԵԱՀԿ Մինսկի խմբի միջնորդությամբ բանակցությունների ձևաչափին՝ խուսափելու հետագա մարդկային զոհերից: Արդեն իսկ երկու կողմերից կան տասնյակ զոհեր, այդ թվում նաև խաղաղ բնակիչներ: Ի հավելումն հրապարակվում են բազմաթիվ դեպքեր ադրբեջանական բանակի կողմից խաղաղ բնակիչներին խոշտանգելու մասին»:

Եվրոպական ժողովրդական կուսակցությունը (ԵԺԿ) նշված բանաձևն ընդունել է Բրյուսելում կայացած քաղաքական համաժողովի ընթացքում:
Բանաձևի ամբողջական տեքստին ծանոթանալու համար հետևե՛ք հղմանը՝ http://www.epp.eu/papers/epp-emergency-resolution-on-nagorno-karabakh-conflict/