Եվրոպա-Հայաստան խորհրդի մամլո ասուլիսը նախագահական ընտրություններին ընդառաջ

2013թվականի փետրվարի 15-ին Եվրոպա-Հայաստան խորհրդի (ԵՀԽ) մի քանի անդամներ Երևանում հրավիրել էին մամլո ասուլիս, որի ժամանակ ներկայացրեցին 2013-ի փետրվարի 18-ին Հայաստանում ազատ և արդար նախագահական ընտրություներ անցկացնելու իրենց կոչը: Միջոցառմանը ներկա էին մեծ թվով հայաստանյան լրատվամիջոցներ (հղումները՝ ստորեւ):

Ասուլիսի ժամանակ Եվրախորհրդարանի պատգամավոր Ֆրանկ Էնգելը, ՀՀ-ում Գերմանիայի դաշնային հանրապետության դեսպան Հանս-Յոհան Շմիդթը, Ֆրանսիայի Ազգային Ժողովի պատգամավոր Ֆրանսուա Ռոշբլուանը հաստատեցին, որ նախագահական ընտրությունների պատշաճ անցկացումը կամրապնդի Հայաստանի դիրքերը քաղաքական և ժողովրդավարական համատեքստում` դարձնելով Հայաստանը գրավիչ և կարևոր գործընկեր Եվրամիության համար: Եվրոպա-Հայաստան խորհրդի անդամները նաև համոզմունք հայտնեցին, որ նախագահական ընտրությունների պատշաճ անցկացումը դրական ազդեցություն կունենա առաջիկա նոյեմբերին Վիլնյուսում նախատեսված Արևելյան գործընկերության գագաթնաժողովի ժամանակ Խորը և համապարփակ ազատ առևտրի գոտու շուրջ բանակցություններն ավարտին հասցնելու գործընթացի վրա` այդպիսով կարևոր դեր խաղալով դեպի Եվրոպա շարժվող Հայաստանի խոստումնալից ապագայի համար: